Ek Din Achanak Part 22
Raat Jay aur Jawed dono ke liye chinta se bhari thi ki aage kya hoga, kaise hoga. Lekin sabse jyada musibat to Jawed Bhai ke saamne aa khadi huyi thi aakhir unhen Jassi ko jo jhelna tha. Khair jaise taise karke dono khaskar Jawed Bhai ne raat gujari aur agle din subah subah pahunch gaye Jay ke ghar par is tension se nijaat pane.
Wahaan jaakar dono ghanton sochte rahe lekin sab dhaak ke teen paat wali baat saabit huyi. Matlab koi hal nahin nikla is musibat ka. Jawed Bhai ke chehre par paseene ki boonde saaf dekhi jaa sakti thi jo darsha rahi thi ki wo kitna pareshan hain.
Dono kisi natije par nahin pahunch pa rahe the. Khair Jawed Bhai ne khamoshi ko todte huye kaha “Ek Ummed bas yahi hai ki agar Jassi ki behan, Jassi se pata pooch kar Manish ko bata de to Manish ke through ye khabar hum tak pahunch jayegi. Lekin iske hone ke bahut kam chance hain kyunki jaisa Manish ne bataya hai ki dono behnon mein bolchal band hai aur jaldi dono mein sulah kabhi nahin hoti usse hamare haq mein koi baat nahin banti.”
Jay jo itni der se khamosh tha Jawed Bhai se bola “Phir aap hi bataiye kya karna chahiye. Main aise ghut ghut kar nahin jee sakta. Isse to achha hai ki mujhe maut aa jaaye. Sabki tension hi khatam ho jayegi.” Aur itna kehte kehte Jay ro pada.
Jawed Bhai ko pata tha ki ab agar wo beech mein kuch bole to Jay koi anarth na kar de isliye unhone Jay ko rone diya taaki wo apna dil halka kar sake. Jay kaafi der tak rota raha aur jab thoda shaant huya to Jawed Bhai ne kaha “Theek hai sirf tere liye main Jassi se milne ko tayyar hoon aur agar jarurat padi to (Allah na kare aisa din aaye) to usse pyaar ka natak bhi kar lunga. Waise kisi ka dil dukhane ka man nahin karta lekin tujhe yun rote huye bhi nahin dekh sakta.
Jawed Bhai ne lambi saans lekar ek baar phir Manish ko phone kiya aur Sonali ka pata nikalne ke liye request ki. Manish ko to jaise bahana chahiye hota hai Jassi ki behan se baat karne ke liye. Usne Jawed Bhai ke phone kaatte hi turant Jassi ke ghar phone milaya.
Lekin haye ri kismet phone jassi ne uthaya aur Manish jaldbaazi mein awaaz bhi nahin pehchaan paya.
“Aur Jaan badi der kar di phone uthane mein”
“Kaun bol raha hai badtameez”
Manish ke haath se phone girte girte bacha. Usne ghabrakar phone neeche rakh diya. Uski himmat hi nahin padi dubara phone karne ki. Apne aap ko kos raha tha ki kyun awaaz nahin pehchani. Kyun itni jaldbaazi dikhai. Kuch Jassi par bhi gussa aa raha tha ki kambhaqt use hi phone uthana tha.
Idhar Jassi ne phone kaatte hi gusse mein phone patak diya aur man mein boli “Bada badtameez banda tha. Kitni gandi baat kar raha tha”
Aise hi badbadate huye usne ek baar ghoor kar phone ko dekha aur apni padhai mein lag gayi.
Jawed Bhai ne Manish ko koi aadhe ghante baad phone kiya aur poocha ki pata chala kuch to Manish ne jhoot bol diya ki Jassi ki behan ko kuch pata nahin chala. Humein khud hi pata karna hoga (Ab wo kaise bataye ki uska to popat ban gaya tha phone par)
Jawed Bhai ek gehri soch mein doob gaye the. Ek ummed ki kiran jo dikh rahi thi wo bhi bhuj gayi. Lekin wo himmat haarne walon mein se nahin the. Apne aap ko wo tayyar karne lage Jassi se saamna karne ke liye. Itna to tab bhi nahin tense huye the jab poore zone ka cricket match ka final tha. Na kuch karte ban raha than a kuch kehte. Soch ko to jaise jung lag gaya tha Jawed Bhai ki. Jo Jawed Bhai sabki musibaton ka hal chutki bajate nikal dete the aaj apni hi musibat se chutkara na milne ki wajah se mayus the.
Jawed Bhai ne Jay se kaha “Jay ab yahi aakhiri raasta bacha hai. Main kal us Jassi se milta hoon aur usse Sonali ka pata lagata hoon. Tu kisi baat ki chinta mat kar. Mere rehte tujhe koi pareshani nahin aayegi. Sab theek ho jayega”
Jay ki aankhon mein khushi ke aansu aa gaye aur usne Jawed Bhai ko gale se laga liya aur subakte huye kaha “Jawed Bhai aap mere liye itna sab kar rahe hain. Itna to shayad mera saga bhai bhi nahin karta mere liye”
Jawed Bhai ne kaha “Lagta hai tujhe thappad khane ki aadat pad gayi hai mujhse. Tujhe kal bhi bola tha ki tere par koi ehsaan nahin kar raha hoon. Tu yaar hai apna. Tere liye jaan haajir hai dost”
Jay kuch nahin bola bas halka sa muskura diya aur dubara Jawed Bhai ke gale ja laga.
Jawed Bhai ne apne seene par paththar rakhte huye kal ki mulakat ka faisla liya. Ab kal ki ye mulakat kya gul khilati hai ye to aane wala waqt hi batayega.
Agla din Jassi-milan ka pratham din tha. Waise to Jawed Bhai roz hi nahate hain lekin us din khub ragad ragad kar nahaye aur apne aapko tip-top banaya. Bas fir kya tha jo saalon mein inhone nahin kiya maslan facial, bleach aur aise hi kai chehre ki raunak badhane ke upay, aaj saare ke saare apne aap par prayatan kar liye. Nayi kameez, fitting ki pant pehan kar aur khusbudar perfume laga kar wo aaine ke saamne khade ho gaye aur apne baal sanwarne lage.
Unhen to aaj har haal mein Jassi ko impress karna tha.
Baar Baar Jawed Bhai ne apne aapko aaine mein dekha ki kahin koi kami to nahin re gayi. Kai baar hota hai ki jise aap pyaar karte hain uske saamne jaane ke liye aap aise hi swang rachte hain. Matlab aap apne vyaktitva tak ko badalne ke liye tayyar ho jaate hain.
Lekin har baar ye tareeka kaargar sabit ho aisa jaroori nahin hota. Bahut baar pasa palat bhi jaata hai.
Jawed Bhai poori tasalli karne ke baad ghar se bahar nikle, dost se udhar li huyi motorcycle uthayi aur hawayon se baat karte huye pahunch gaye us institute ke saamne jahan Jassi padhne aati thi. Jahan Jassi 9 baje aati thi apne Jawed Bhai usse 15 min pehle hi wahan pahunch chuke the. Baar baar ghadi ki taraf dekh rahe the aur soch rahe the ki kab 9 baje aur unhen Jassi se milne, use dekhne ka mauka mile.
Jassi 9 bajne mein 2 min baaki honge tab saamne se aati dikhai di. Najrein neechi karke aur haath mein ek notebook aur pen uthakar institute ki taraf chali hi jaa rahi thi. Jawed ki taraf usne kuch gaur hi nahin kiya. Jawed Bhai ka to dil dhak se reh gaya aur apna sar peette huye man hi man bole “Apni to kismat hi kharab hai jiske liye itna ban-than kar aaye wo to ek najar utha kar bhi nahin dekh rahi”
Lekin kehte hain na bhagwan ke yahan der hai andher nahin. Institute ke paas pahunchne par Jassi ne ek baar apni najar uthayi aur saamne dekha. Achanak use saamne institute se thodi door khade Jawed Bhai najar aaye to wo apni sudh budh khokhar ek tak unhen niharne lagi. Wo to ye bhi bhool gayi thi ki wo yahan aayi kisliye thi.
Jawed Bhai ne jab dekha ki wo unhen hi ghoor rahi hai to dandanate huye pahunch gaye Jassi ke paas. Jassi ki to saansein hi atak gayi thi achanak Jawed Bhai ko yun saamne dekhkar. Usse na to kuch kehte ban raha tha aur na hi kuch karte. Is chuppi ko Jawed Bhai ne hi toda “Main kabse tumhara intejar kar raha hun yahan. Itni late kyun aayi”
Jassi ne najrein ek pal ke liye uthayi aur Jawed se milane ki koshish ki lekin najrein milte hi turant usne sharma kar najein phir se jhuka li aur kaha “Late kahan huyi hoon. 9 baje ka hi to time hai”
“Oh! Haan Sorry, main hi kuch jaldi aa gaya tha”
“Kyun kuch kaam tha kya aapko mujhse” Jassi ne ladkhadati aur dabi awaaz mein poocha
“Ab tumse milne ke liye mujhe kisi wajah ki talash karni padegi kya. Kya main tumse milne nahin aa sakta kya”
“Mujhse milne par kyun”
“To theek hai chala jaata hoon” Aur ye kehkar Jawed Bhai mud gaye.
“Nahin nahin mera wo matlab nahin tha. Maine kab kaha ki aap milne nahin aa sakte” aur itna kehkar Jassi ne sharmakar apna chehra jhuka liya.
Jawed Bhai man hi man muskura rahe the ki Jassi ko wo patakar hi dum lenge. Unhone kaha “Jab se tumhein dekha hai bas deewana sa ho gaya hoon. Har jagah bas tum hi tum najar aati ho. Main to tumhari yaadon mein sonaa-jaagna, khaana-peena sab bhool gaya hoon. Tumhe dekhne ko aankhen tarasti rehti hai, baat karne ke liye dil machalta rehta hai, hamesha tumhara saath bana rahe dil mein bas yahi ek channel chalta rehta hai.”
Jassi ko kuch samajh nahin aa raha tha ki jis Jassi ko log behanji, chasmis, padhaku, lassi aadi naamon se pukarte the, jisse dosti karna to door baat karna bhi apni tauheen samajhte the, usi Jassi ki tareef school ka sabse honhaar ladka kar raha tha. Kya wo majak kar raha hai uske saath. Lekin use pata tha ki Jawed ne aaj tak kabhi jhoot nahin bola tha. Phir kyun wo aisa bol rahe hain.
Jassi ko chup dekhkar Jawed Bhai ne aage kaha “Tumhe shayad vishwaas nahin ho raha hai. Lekin tum to jaanti hi ho main jhoot nahin bolta. Jis din se tum school mein aayi ho har samay bas tumhara hi khyaal rehta hai. Tumhare baat karne ka tareeka, tumhara intelligence, har ek baat ki gehrayi tak jaane ki lalak, nayi cheezon ke baare mein janne ki utsukta ne mujhe tumhara deewana bana diya hai. Main tumse pyaar karne laga hoon. I Love You.”
Jassi ki aankhon se khushi ke aansu tapak pade aur rundhe gale se Jawed ke gale se ja lagi aur boli “Main bhi aapse bahut pyaar karti hoon par darti thi ki kahin aap mujhe thukra to nahin doge. Isliye apne dil ki baat kabhi juban par laa hi nahin paayi. I Love You Too”
Aur ye kehte hi dono ke fadfadate huye honth kab ek doosre ke saath jud gaye unhein pata hi nahin chala. Aisa lag raha tha ki jaise dono janmon janmon ke pyaase hain ek doosre ke liye. Dono mein se koi bhi peeche hatne ko tayyar nahin tha. Ek doosre ko chumte huye, baahon mein liye huye aur apni aatmayaon ka milan karte huye ek doosre mein khoye huye the.
To be continued....
Kareem
13-Jan-2022 08:33 PM
Great
Reply
Swati chourasia
12-Oct-2021 07:33 PM
Very nice 👌
Reply
Shalini Sharma
30-Sep-2021 07:14 PM
Nice
Reply